ნინოწმინდის მუნიციპალიტეტში ცნობილი სომეხი პოეტის, ლირიკოსისა და საზოგადო მოღვაწის, ვაჰან ტერიანის ხსოვნისადმი მიძღვნილი ტრადიციული ღონისძიება 58-ედ გაიმართა.
ღონისძიება სოფელ განძაში, ტერიანის სახლ-მუზეუმის დათვალიერებით დაიწყო, რის შემდეგაც სასულიერო პირებმა წმ. კარაპეტის ეკლესიაში პოეტის სულის მოსახსენიებელი პარაკლისი გადაიხადეს.
დღე საზეიმო კონცერტით გაგრძელდა, ღია ცის ქვეშ მოწყობილ სცენაზე მაყურებლის წინაშე ადგილობრივი ცეკვის ანსამბლები და ინდივიდუალური შემსრულებლები წარდგნენ.
სტუმრებს სიტყვით მიმართეს სამცხე-ჯავახეთში სახელმწიფო რწმუნებულის პირველმა მოადგილემ – დავით ვარდიაშვილმა და ნინოწმინდის მუნიციპალიტეტის მერმა ანივარდ მოსოიანმა. აღინიშნა, რომ მსგავსი ღონისძიებები მნიშვნელოვანია, ხალხთა შორის მეგობრული ურთიერთობების გასაღრმავებლად.
ღონისძიებას ასევე ესწრებოდნენ პარლამენტის მაჟორიტარი-დეპუტატი სამველ მანუკიანი, საქართველოში სომხეთის რესპუბლიკის ელჩი აშოტ სმბატიანი, ნინოწმინდის საკრებულოს თავმჯდომარე ვაან აროიანი, ნინოწმინდის, ახალქალაქისა და ასპინძის მუნიციპალიტეტების მერიისა და საკრებულოს, ასევე, კულტურის სფეროს წარმომადგენლები.
Georgian
Armenian
English